عفواً ... ولكنها الحقيقة !!!

بقى يا واد يا منيل على عينك ما عرفتش تدخل طب علشان تبقى دكتور زى ابن سنية القرعة اهو قاعد يكبش ويلم فى الفلوس زى الرز
حلم كل اب وام و شاب وفتاة فى الزمن دة يا اما يطلع دكتور او صيدلى او مهندس وياسلام بقى لو مهندس بترول اصل الناس دى يا أبا بتقبض بالدولار ومكنزين على قلبهم قد كدة.

يا اما بقى يشتغل شغل حر ويفتحله شركة تصدير واستيراد وبردة يستورد من الصين ويصدر الطرشة ..

او ممكن يفتح اجنص عربيات ويبقى ملك وصاحب توكيل عربيات كارو بالحمير ودة لفترة محدودة ..

والله ممكن كمان يفتح جزار اهم بردة بيبيعوا كيلو اللحمة بـ 60 جنية وزمنهم عاملين خميرة حلوة ..

ولو واد لية فى التكنولوجيا يفتحله سيبر ويجبله جهازين ويعمل الساعة بـ 1.50 ولو جدع كمان يسحبله سلكين نت ويعمل شبكة مع الناس اللى فى الحارة والشهر بـ 30 جنية واهو بردة يبقى مشروع العمر ..

ولو دحيح يطلع معيد ويولعها كورسات يا معلم والترم بـ 600 جنية واللى ما يقدرش يدفع 500 بس واهو كله لله بردة ..

ولو ليك فى الرياضة تروح الجيم سنة على ما يطلعلك باى وتراى ومجانص وتبقى بودى جارد لتمورة دة كمان ممكن تضرب معاك وواحد منه لله يكتشفك ويعملك شريط ويسميه توتو الواد امبو للفنان الشهير سيكو عضلات ...

اصل يا معلمى العلم دلوقتى لا يكيل بالبتنجان ... واللى اتعلم خليه ينفعه ...واللى معاه شهادة يحطها فى ***** برواز ويعلقها فى الصالة ..



عفوا يا بنى ادمين اللى عاوز يجيب فلوس
يا يطلع لعيب كورة ...
يا يطلع رقاصة ...
يا بتاع حشيش ...
يا يفتح مصنع حديد ويسميه حديد عز ....

انا اسف علشان قومتك من على دور الضومنة روح كمله والمشاريب على الخسران

تأخد حشيش ... !! ?

عن قصة واحد صاحبى D:
والنبى يا خويا انا كنت قاعد فى السنترال لا بيا ولا عليا واذ فجأتا دخل عليا واحد واخد بتاع 20 مطوة فى وشه ولابس هدوم غريبة ومريبة
واد سيس كدة وعملى نفسه مزنجر .. او بكار ..
ويبدوا والله اعلم انه كان مبلبع حاجة ... عصير قصب او شاى باللبن مش متذكر قوى ..
وتقريبا كدا كان بيجرى من حد يا بوليس يا مراته ..

وقف قدامى بتاع ربع ساعة علبال مأخد نفسه ... واول كلمة نطقها مش قادر احددها الصراحة هى كانت ما بين السلام عليكم ومساء الخير
دة على فرض انها كانت كلمة عربى اساسا
ما علينا ...

- الزبون : آمر
- انا : نعم !! حضرتك اللى تأمر
- اه لمؤخذة
- لا ولا يهمك
- انا كنت .. ع .. ا عايز اطلب نمرة
- كام النمرة
- انت بتكلمنى ..
- حضرتك النمرة اللى انت عوزها كام علشان اطلبهالك
- اه ... 56****20
- كابينة رقم 3

هو تقريبا ما فهمش المعلومة قوى او انا اللى موضحتش علشان هو دخل كابينة 2

- انا : يا ... الكابينة اللى بعديها مش دى
- الزبون : دى
- يا عم لا اللى من الناحية التانية

هو اليوم اصلك بيبقى باين من اوله .. الله يكون فى عونه بجد كفاية انه تاعب نفسه وجه لحد السنترال اصلا
وبعد ما قعد يرغى بتاع نص ساعة .. مش قادر احدد اللغة الى كان بيتكلم بيها الصراحة

- الزبون : انا خلصت خلاص
- انا : الحساب 2 جنية
- ثوانى اشوفلك كدة
- على مهلك
- انا الصراحة مش لاقى فلوس معايا

انا قولت اليوم بيبقى باين من اوله

- انا : طب وبعدين
- الزبون : خلاص تأخد حشيش بدل الفلوس

اكيد انا ماسمعتش كويس او فى حاجة غلط حصلت (اعوذ بالله من الشيطان الرجيم)

- انا : نعم ؟؟
- الزبون : بقولك تأخد حشيش بالاتنين جنية بتوعك
- كدة بقى انا سمعت صح ..... حشيش !!!!!!!!!!!!!!!!
- اه يا عم حشيش علشان ممعيش فلوس معلش .. اقطعلك حتة بـ 2 جنية واكرمك فيها كمان
- لالالالا شكرا مش عاوز لا حشيش ولا الـ 2 جنية .. انا مسامح فيهم
- بســ ...
- ما بسش ولا حاجة طريقك اخضر يا باشا
- اسمع بس منى يا زميلى ...
- شكرا يا عم احنا مسامحينك فى الفلوس
- خلاص بقى ما دام اصريت متشكرين يا عسل
- مع السلامة يا طحينة

اكيد طبعا كان بيجرى من البوليس ...