صباع هز عرش مصر

انا مبسوط قوى بقى ...
مبسوط بصباعى لدرجة انى بفكر اقطعه واحتفظ بيه للذكرى ... ولما اكبر واعجز وانا بموت انادى على الواد ابنى واقوله هات الصندوق اللى فى البدروم وهات اخواتك وتعالى ... ولما يتلموا حوليا اقولهم الصباع دة يا ولاد .. ا ا ا.. ا. ا........... باباااااااااااااااااا

ومبسوط لانى اول مرة فى حياتى كصباع اغوص فى الحبر .. والراجل يقولى كفاية يا حبيبى كفاية .. مكنش حاسس انى مشتاق اغوص فى الحبر بقالى 21 سنة

كنت عاوز اشترى شوية حبر بـ 50 قرش من الراجل اللى واقف علشان كل مايتمسح احطه تانى على صوباعى

ومبسوط لانى كصباع بقى ليا قيمة وسط الصوابع التانية

ومبسوط لانى شربت من نيلها .. ولحوست صباعى فى حبر انتخابتها

مبسوط لدرجة انى قاعدت ابوس فى صباعى لحد ما شفيفى احمرت .. ولما دخلت البيت لقيت امى بتقولى (رافعه حاجبها الايسر) هو انت كنت فين بالظبط D:

انا متأكد ان انتوا بتبدلونى نفس الشعور .. احساس بانك عاوز تغتصب صباعك من الفرحة

ومبسوط لانى كنت ماشى فى المنطقة رافعا صباعى وبغنى .. معايا صباع .. معايا صباع

ولما قابلنى عم احمد قالى .. مبروك الصباع يا بشمهندس .. وقاعدت اقنعه انه عنده صباع زيى ولازم يروح يجرب الحبر

مش مشكلة قولت اية المهم انى جربت الحبر واتأكدت ان صباعى شغال

ياااااااااااا اخيرا بقى عندى صباع ..

بس انا خايف ...
خايف ان الحبر يخلص تانى .. بعد ما اتحرمت منه 21 سنة ... ومالقيش حبر الحوس فيه صباعى