الصبر مفتاح فرنساوى

صبرت ... وانا وصبرى بقينا صابريين مع بعض نمشى وفى الصبر عايشين
واتصاحب عليا وبقيت انا وصبرى متصبرين
وفضلت اصبر وأصبّر نفسى بحبة صبر صغييرين
لحد ما صبرى صبر عليا ايام وسنين
اصل الصبر دة رزق يأخده الصابر والصابريين
وصبرت ... ولما صبرت ضحكوا عليا وصبرونى بأم حسين
واخرة صبرى صابر و صبرى واحسن انها مش صابرين
تيجى انت يا صبرى تقول لصبرى اصبر طب ما انا كنت صابر وكنت انت يا صبرى اخرة صبرى
ويجى صابر يقول لصبرى أصبر دة صبرى مش صابر وانت اللى فضلت صابر مش عارف تصبر على صبرى
طب ما انا عارف انى كنت صابر لحد ما صبرى عمل جبلين
دة انا اللى الصبر صبر عليا ومن كتر صبره قال اهيين
ياريتك يا صبرى ماكنت صبرى وطلعت صابرين
ويا رتنى ما كنت صبرت ورضيت انا بأم حسين

ربنا يخليكى ليا يا أم حسين D:

الوصايا الخمناشر لإختيار الزوجة

قبل ما تنضم لحزب المغفلين "المتجوزين سابقا" واجب عليا اقولك كأخ وكزميل عزيز
من واقع تجربتى من داخل اسوار كلية الهندسة قسم ميكانيكا
لازم تكون متأكد فى قرارة نفسك انك حتدبس

عندنا نوعين يا حتتجوز من جوة اسوار هندسة يا من خارجها
فى كلا الحالتين لازما ولابد تتأكد انها كانت تعليم مجانى

(نقفش فى اول نوع ... من جوة هندسة)

ما تتجوزش واحدة من حاسب... لية بقى ؟
اولا حتصحيك الساعة 7:14 ولا صحيت 7:15 حتعملك Debug دة كمان ممكن تقلبلك الصالة Array وتخليك تلف فى Loop الشقة 5 مرات قبل الـ Function وبعدها ودة ممكن يتسسب فى طردك من الـ class ونضطر نعملك call تانى دة غير انها اصلا جايبة امتياز وحتقعد تتنطط عليك

ما تتجوزش من قسم كهرباء... لية؟
علشان حتشتغلك فى الـ C وكل طلباتها حتكون على التوالى وبعدين لما تيجى تدلعها حتقولها "يا لمبة حياتى مين غيرك ممكن يقلوظ قلبى الحياة قابلك كانت سلك عريان" ولما تحبوا تتفسحوا حتروحوا الـ breadboard

وماتتجوزش واحدة من ميكانيكا... لية ؟
حتكون عارفه انت درست اية وكمان مستواكم العلمى حيكون قريب لبعض يعنى مش حتعرف تتنطط عليها D:

لو حتتجوز من الاقسام التانية بقى تعدى الاول على شئون الطلبة تسأل البت دى كانت جايبة كام فى اعدادى وحتلاقى الناس متعاونة الصراحة
وبالمرة تسأل اذا كان ليها اخ ولا حاجة فى الكلية للإحتياط بردة

ما تتجوزش من قسم مدنى ... لية؟
احتمال تجيبوا الدبل من عند حديد عز .. ومش بعيد تلبس يوم الفرح سديرى مكتوب علية المقاولون العرب .. ولما تحب تتفسح معاها حتلبسك خوذة .. و تلاقى شريطة صفرا على باب المطبخ مكتوب عليها منطقة عمل .. دة غير كدة ولا كدة حتلاقيها بتشجع اسمنت اسيوط

ما تتجوزش من قسم عمارة ... لية؟
خطوة خطيرة زى دى لازم تعملها موديلينج قبل ما تفكر فيها .. وكمان تبصلها من كذا منظور .. لانكوا مش حتخلفوا !! .. حتعملوا ماكيتات عيال وترندروها .. ولما تحبوا تأكلوا مش حتأكلوا على ترابيزة السفرة .. حتأكلوا على شاسيه .. دة غير ان جهازك مش حيكون من عبد الرحيم عمرو .. حيكون من روترنج .. وحتصحيك الساعة 0.7 بتوقيت HB

ما تتجوزش من قسم كيمياء ... لية؟
لو قلتها حضرتك مرتبطة مش حتفهمك لازم تقولها "مدارك الأخير اية ظروفه" .. ولو قولتلها انا عاوز اتقدملك مش حتفهمك بردة لازم تقولها " عاوز اعمل رابطة تساهمية مشتركة ونكون سحابة اليكترونية مع بعضينا" .. وحتكتب كتابك على ورق ترشيح .. وبعدين مش حتجيبوا دبل .! حتشتروا جوانتيات ... ولما تتفعلوا مع بعض تجبولنا ابخرة بنية حمراء .. والعيال مش حيرضعوا من البزازة حتجبلهم سحاحا

اوبااااااا نسيت اقولك صحيح ما تتجوز من بتوع الاقسام الخاصة .. لية؟
انا معاك طبعا ان الكلية اتقدمت والرانك بتاعها ارتفع بعد ما فتحوا الاقسام الخاصة ومن ساعتها وإحنا عندنا إكتفاء ذاتى بس يا معلمى حتقعد تحورلك بقى انا بابى اللى عمل مارينا وانا مامى بت الملك فاروق وانكل اللى امم القناة وحتلاقى نفسك بقيت رئيس مراجيح مولد النبى (مع كامل إحترامى للمراجيح)

بالنسبة بقى للنوع التانى ففكك منى انا مش فاضى D:

عندما يعشق الميكانيكى

ادينى اتنيلت على عينى وبامب قلبى اشتغلت .. ومن ساعتها قاعد الف فى المرايات والماتور وبنزين قلبى مش دارى بيا وفى الرايحة والجاية اظمرله وهو مش سائل فيا ....

ظمارة رقم 1
ويابت جمالك هبشنى والهابشة جت فى الماتور ما تشحميلى قلبى علشان بساتنى تدوور
وكبوتى

ظمارة رقم 2
يا رولمان بلى روحى زحلقتنى قى هواك ... ما تزيت قلبى يا قاسى وسيب الشكمانات .....
ايييية وكبوتى

ظمارة رقم 3
يا زايد فى الحلاوة عن اهل قسمنا ماتبطل الشقاوة وتعالى عندنا
اييييييييييية وكبوتى


بس يا سيدى وقام قايلى لا يجوز كشف وش السلندر على اى سمكرى الا بوجود كبوت محايد وذلك لان الجمع بين 7 بساتن فى ماتور واحد مكروة .. والثيرى بتقول الماتور اخره 6 بساتن بس .. ولازم تأكد على البوجيهات علشان كل واحد يبقى عارف اللى لية واللى عاليه .. والبستون اللى يحب يخلع ترميله كرانكه فى وشه ويروح لمصنع ابوه
دى حاجة فرملت قوى وما يستحملهاش اى راديتر فى الدنيا .. وكل مرة اقولة خلي بالك من شفطك علشان تنك اهلى ولع من الغباء
عيال بنت كربراتير صحيح ....!
وانا شكمانى ماعتش مستحمل اى شاسيه فى المنطقة و قولتله وحلفتله على المسًاحات بحبهااااااا ودايب فى فوانسها واشاراتها ..ابو دى دماغ بنت مرشدير .. قالى خلاص انت تتقدملها وتجيب معاك الفتيس واتنين مرايات وتجيب الاول وتيجى .. ولو حصل نصيب يبقى تتحرقوا انتوا الاتنين مع بعض وتطلعوا من دبرياجى ونفرح ونظقطط ونقرقع بوجيهات ونعملوا الفرح فى الكنبة اللى ورا .. وتقضوا شهر العسل فى الشنطة

وانتظرونى فى ديوان انا عوزة اتجوز ميكانيكى قريبا على البلوجات

بحبك يا بجرة
:D

صنع فى مصر

مع صنع فى مصر حتعيش المعنى الحقيقى لتعبير "تحت السلم"

يعنى اية صنع فى مصر
يعنى تنفرد مصر بتصنيع الاسفلت الوحيد اللى بيسيح عند درجة حرارة 30
يعنى حزام الامان فى العربية تشده بأيدك وترجعه بردة بأيدك
يعنى تشترى تى شيرت "فنلة" مقاس XL واخوك الصغير هو اللى يلبسها
ملحوظة:

• عمليا اخوك هو اللى لبسها نظريا انت اللى لبست التى شيرت
• القطن اللى التى شيرت مصنع منه .. لمؤخذة طويل التيلة

يعنى تشترى طبلة باب جديدة والمفتاح القديم يفتح عليها
يعنى لو عندك صداع مغص اسهال امساك كحة مكسور او حتى نظرك ضعيف ... حباية اسبرين وادعيلى
يعنى الوسيلة الوحيدة لاصلاح التليفزيون هى فردة الشبشب الشمال
يعنى زرار الباور فى الريموت بيقلب القنوات
يعنى الغيارات الداخلية متنشرة على اول حبل غسيل من ناحية الشارع
يعنى لما تحب تسمع اغنية لازم تسمع بقيت الشارع معاك
لما تبقى كل فكرتك عن صندوق الزبالة .. انه مركز دايرة نصف قطرها 2 متر
يعنى علشان تركب مشروع لازم تأخد واحد على رجلك
يعنى علشان تأخد ختم الجودة انك مصرى لازم تكون وقفت فى طابور 30 واحد على الاقل
يعنى لما يبقى فى كمين ولا ردار نصف مصر بتعرف
يعنى تربط الحزام قبل اللجنة بمتر ونصف
يعنى البلاعة مفتوحة ومجهزة لاستقبال اى ضيف 24 ساعة
.....
دماغى فصلت انتظر اعادة التشغيل

شخبطة

عندما بظت الاشواق من قلبى

وحشتنيى يا دزمة

حب من طرف ارضى

‫ومنى إليك تحيتا بنشاطا يا من بها فرح الفؤاد وظاطا ‬

‫تسمحيلى اخطفك ؟

حبيبى انح انح ماتبقاش تقيل ادينى جبنة رومى او حتى رجل فيل

بحبك يا بجرة

يلا يا بت اجرى كدة وانت حلوة كدة وعسولة كدة

عيال فافى من اللى بيعملوا سيف ريموف للفلاشة

شلوط سعادتك دفعة للأمام

وانا من هذا المزنق احب اقول يا بركة دعاكى يا أما

‫من طلوع النهار وانا على نار فى الانتظار وقاعد من الصبح من غير فطار ولما شوفتك عقلى طار

‫انا مش جولتلك مرة .. يا بيبى

دة على اساس ان انا قفص جوافة

طب وانت مش حتعدينى السكة بقى ؟ لية هو انتى مش بتعرفى تعدى لوحدك !!!

‫انت خوخة انت مشمش انت عندى حاجة تدوش انت عندى زى الاريل لو تغيب لحظة اوشوش

جاءت عينى بعينها اللامعه ... فتضع يدها بين يدى .. ثم ترتمى فى احضانى ... واضعة رأسها على كتفى ... بعد ان قبلتنى
قائلة : موود ارجحنينى
والترجمة : محمود مرجحنى

‫يلا يا شعب بيرجع شعره لورا

اللى يخاف من الساقعة حيفضل طول عمره مستغطى

ورجعت من السفر دايب من الفراق مشتاق للمية السخنة وفى لحظة الاشتياق
فتحت الباب لقيت ورقة مكتوب عليها السخان بايظ لا تحاول تشغيله
اووه شيت

بس يا عم قعد يقولك هوت شمبير وكولد شمبير لحد ما احنا اللى اتشنبرنا فى الامتحان

بس يا سيدى وقاموا مطلعين تربنتين اهله وقالولك كان تاجر مخدرات

‫قد تمثل d
بالنسبة إليك نصف قطر العينة ولكنها تمثل بالنسبة لى نصف قطر الخزووق
وكل إمتحان تيست وانتم متشنبرين

كل اعتداء وانتم بالف خير وعقبلنا جميعا
ومتمنين لهم دوام الاعتداءات

‫ًصباحنا زبادى بإذن الله

وفجأة تحول الـ Example الى Eggsample فقمت مقيل شوية

لقد وجـــــدتووووها وجدتووووووووووهاااااااااا وجدتوهااااااااااااااا وجدتوها ااااااااااااا وجــــــــدتــــــــــوهــــــا
يا عالم يا معفنة

المكان ديق والحمار رفاس

‫انا مش بعيد يا بت عنك دة اللى بنا مدرجين ورغم شوقى وقربى منك صعب انطلك سنتين .... ومش عجبى ولا حاجة

انا دلوقتى مش فاهم هى الناس بتغنى ببقها ولا بوسطها ؟؟

‫اللى يطرقع ما يتحسبش

بعد وقف التليفونات الصينى : ‫السؤال اللى محيرنى .. طب هما ليه استوردوها من الاول ؟؟ اختر الاجابة الصحيحة كانت عمله نفسها فانوس رمضان - كانت مخالفة للشرع لان نوكيا محلل له شريحة والصينى اخد شريحتين - ولا لانه الموبايل الوحيد اللى يقدر يستقبل القناة الخامسة

‫هى اية لزمة البنات اللى بتتصور جنب العربيات فى ملحق السيارات ؟؟ يعنى لو دة اوبشن زيادة على العربية انا حشتريها وش

‫يا أخى أتهد بقى واهمد انت ما بتزهقش قرفتنا فى عشتنا يا باى عليك دة انت غتت .. يا بايظ .. جتكوا البلاوى مليتوا البلد

‫أشتروسى الجنزبيل

!!!! يا لا لا لش

‫يا مسطب حبك في قلبي ومكنسل منه الآهات بعدك خلاني أهنج وأحرق كل الرامات كرت عيني ولع وكمان السوندات من كتر ما اتحركت انصبت بالبادات فضلت أدور عليك نصحوني بالشات أتخيلت بيك يا خسارة طلعت فيروسات من بعدك عقلي خلاص أتعمله فورمات وعلشان أشوفك تاني لازم ابقي فات لا نافع في ويندوز ولا حتي ريد هات من كتر ألم فراقك بسقط ملفات عملت سكان لقلبي مالقتش بارتشنات

‫انا حترشح لرئاسة مراجيح مولد النبى !!؟؟

‫ان الرعيل الاول من اللبرالية اضفى سيكولوجية انفعالية للوقف عند الزامى لما يصبوه التحرر الدرامى من براثن التقيد بكل ما هو منبثق فى حب الذات (المهم انى لقيت بتاع البانجو اجبلك معايا)

ان الفائدة الحقيقة من علم الرياضيات[اللى بيسموها العيال الفافى الماس] هى ايجاد قيمة "اكس" الله يحرقها
ودة يندرج تحت تصنيف يا عم طريها دة الناس لبعضيها

‫انا كنت رايح اتكلم فى صناعة الصواريخ لقيتنا بنتكلم فى زراعة البطيخ

ممكن حد يقولى هى الافلام كلها بقت افلام هابطة لية ؟ يعنى الواحد لما يحب يترفه مع مراته (مستقبليا بس انت قول يارب) يروحوا جونينة الحيوانات ولا جونينة الاسماك ويجبلها وردة ويقولها سالخير انا فرحان لشوشتى

أيــــــة انا جـــــــــــــــدع !!!!!!!؟

‫اللى مش عايز وشه النهاردة بكره تحتاج لقفاه

‫الناس شالت مخها وحطت بداله قبقاب الحقلك واحد بقى

ماحدش بيلبسها بالساهل ... الفنلة

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
لا ما تشغلش بالك كنت بجرب الكيبورد

نلتقى بعد الكوبرى اتمسوا بالعافية واشقطوا منى البوسة دى امووووه

متحاولش تبقى مصرى !!

ممكن تكون اتكعبلت مرة فى اعلانات هيونداى بتاعت "متحاولش تبقى مصرى ... العرض دة للمصريين وبس"
بس اكيد كل يوم بتتكعبل فى عروض المصريين ... لذلك لو انت مش مصرى "متحاولش تبقى مصرى ... لان الرفع دة للمصريين وبس"

انتشرت فى الاونة الاخيرة اشاعة احتواء اللحوم على دودة السركوسيست .... طب دى حاجة قشطة قوى
العرض دة للمصريين وبس .. اشترى كيلو لحمة بالدود بتاعه وحنديك صنارة هدية واهى منها لحمة ومنها صيد سمك
ملحوظة :

• متقولش للجزار على حكاية السمك دى لحسن يدفعك ثمن الدود
• يمكن استخدام الصنارة استخدامات أخرى

اما بالنسبة لموضوع الزبالة فقد تطور الشعب المصرى تطور ملحوظ فى الفترة الاخيرة بعدما كان يلقى بها من البلكونة ويستخبى وزى ما تيجى تيجى ... لكن دلوقتى بيتعب وينزل بنفسه يرميها جنب الصندوق من مسافة تبعد حوالى 10 متر عن الصندوق
العرض دة للمصريين وبس .. حاول رمى 5 كياس من مسافات مختلفة وحنلبسك السادس مجانا ...

مش عارف اخدتوا بالكوا ولا لا .. ان المية مرة يبقى طعمها سمك ومرة خيار ومرة ... ولا بلاش
دة غير لونها مرة يبقى اصفر .. ومرة يبقى ابيض .. ومرة شفافة ويسبح بها بعض الكائنات الحية
العرض دة للمصريين وبس .. مصر حتختار طعمها الحق ابعت لشركة مياة الشرب "التشطيف سابقا"
ملحوظة :

• انا شاكك ان فى واحد واقف وراء الحنفية

مشكلة العيال الفافى اللى زيى مع رغيف العيش .. مش ان قطره 10 سم ولا انه فيه رمله و ظلط .. ولا انى مرة بفتح رغيف لقيت رجل صرصار .. ولا انى بقف ساعة الا ربع علشان 5 ارغفة ولا ان عم اسماعيل بيمشى الناس حبايبه الاول ..
المشكلة يا عينى انه بيبقى سخن ومش بقدر امسكه
العرض دة للمصريين وبس .. حاول تستحمل رغيف لمدة ربع ساعة .. وحنوصى عليك عم اسماعيل
ملحوظة :

• على فكرة .. تستحمله اه .. بس مش على ايدك D:
  
• لو حد لقى بقيت الصرصار يا ريت يبعتهولى
• وبالمناسبة دى بوجه ندائى لاخويا التايه فى طابور العيش بقالة 4 ايام وبقله ارجع يا ابنى احنا جبنا عيش فينو ...

وللحديث بقية بعد ما ارجع من باجوش ان شاء الله

مسابقة أسطول الحرية

مسابقتنا مش مسابقة عادية ... دى مسابقة فيها جوايز خيالية
تفتكر لية إسرائيل الوحشة ديه ... ضربت أسطول الحرية
علشان مُحملة برؤوس نووية!! ... ولا إحنا نايمين فى مية الملوخية
تفتكر حتبقى حرب عالمية ... ولا زى كل مرة حبة تقلية
حتنقطع العلاقات الدبلوماسية ... ولا حيعملوا قمة عربية
القمة رقم مليون وسبعمية ... ويأخدوا فيها قرارات وهمية
بيقولك دى جريمة دولية ... ويقولوا دى مجرد تسلية
بيقولك عوزين نحاربهم ... جتك نيلة مش لما تعرف تصنع بطارية
بيقولك يا عم فين الانسانية ... بيقولوا ما أحنا فل ومية المية
بيقولك مصر هى اللى شايلة المسئولية ... طب وانتوا ؟ مافيش لانخوة ولا رجولية
نجبولكم خمسة ستة من بولاق .. يقفلولكوا إسرائيل يومين وشوية
الفيفا حتدفعها غرامة جزائية ؟ .. ولا حتقولها معلش خدى بالك المرة الجاية
طب سلملى على القوانين الدولية ... ولو عرفت الحل اتصل بـ 0900

مش عارف تبكى ولا تضحك .. روح ولع فى نفسك لانك فقدت الأدمية
انا حروح أذاكر بقى علشان ما أسقطش كمان السنة ديه

بقلم: واحد كدة ..

تمورة الامورة ووجهة نظرى الصغيورة

من هو تمورة ؟؟؟
هو شخصية خيالية وسيسية باحتة يتخذونه الشباب قدوة فى "تظبيط البنات" .. بيفتح تلات اربع القميص وبيعلق فلاشة فى صدره، بغض النظر اية لزمتها او حتى هو بيستخدمها فى اية ؟ او بيحطها فين ؟ دة غير انه من الشخصيات اللى لما بتروح الجيم بتلعب بنش بس.
قد يظن البعض ان دى ضريبة الشهرة وأن انا من اعداء النجاح .... احب اقولك اتنيل على عينك
لا خالص دة انا بحب تمورة موووووت موت وكلماته معبرة واستايله جبار وفتحه القميص منورة وتوكة الحزام كبيرة وزى الفل والبنات اللى بتترمى عليه كلهم قمرات والولاد اللى بيبسوه كلهم رجالة... لا وافلامه فظيعة .. وهو دة نجم الجيل ايوة تمورة نجم جيلنا ... وانت يا خراشى عليك
يا أخى ملعون ابو دة جيل .
على فكرة انا مش بنتقض تمورة لا انت فهمت غلط انا بنتقض ظاهرة تمورة
تلاقى الواد من دوول فتحلك القميص ومعلقلك فلاشة ومسقط البنطلون وقاعد بيسمع "وقفتى تتنطتى"
تقوله يا حبيبى يا تقلع القميص يا تلبس الفلاشة يقولك اووف بقى امشى بعيد ... تشده من البنطلون يقولك يا وحش
سيبك من العيال الطرية دى ..!
نيجى للاغانى المعبرة والكلمات الفظيعة .... مش عارف لية فى بعض الكلمات اللى مش عارف افسرها وعلى سبيل المثال لا الحصر

يا تاعبنى / يا تاعبة كل الناس
كل مرة بشوفك فيها ببقى نفسى آه
اخدت كل حاجة فى عهدى
اكتر حاجة بحبها فيكى هو دة ... واكتر حاجة شدتنى ليكى هى دي
خليها تكلكِ

مش عارف هل دة مقصود ولا علشان انا شاب وليه مشاعيرى واحاسيسى فبفهمها غلط


بالنسبة للافلام بقى ما اقولكش هو هو نفس الفيلم مع اختلاف الاسم والبنت البطلة "الموزة" اللى بتتطلع معاه فكل مرة
اما عن الدور المهم اللى بيقوم بيه تمورة فى افلامه :
بيطلع فى الافلام مش بيعمل غير 4 حاجات يغنى ويبوس ويحضن ويقول "هو دة"

قاعدت افكر شوية كدة لقيت الاغانى نصفها ملهاش معنى والنصف التانى أه ه ه ه ه ه ه ه
ولقيت الافلام لا فيها لا قصة ولا هدف ولا سيناريو ولا إخراج ... عالم قاعدين يهزروا مع بعض وخلاص
ولقيت الحياة زبادى فى الخلاط وبنات وولاد قاعدين يبوسوا فى تمورة
وتمورة طبعا مش بيقول لا ...

يا عم يعنى هى جت على تمورة ما هى كدة كدة بايظة
السؤال اللى محيرنى بقى لية تمورة طلع برأة وبقيت الشعب اخد بالجزمة ؟
ومنزل شريط جديد اسمه "أخترت صح" ومحدش اداله الدرجة النهائية ؟

زنقة وتعدى ..!!

مش عارف ... بس وللحظة من التفكير إكتشفت ان الانسان المصرى الاصيل بيعمل كل انواع عمليات الإخراج الخارجية والداخلية فى الشارع ...
وبما أن دة اصبح بالنسبة لينا حاجة عادية فما فيش اى مشكلة
تعالوا بقى نبحث مع بعض فى الاسباب .... ماهو يا اما ممعهوش مناديل ودة بيبقى للعمليات الخارجية
يا اما مش لاقى حمامات عمومية ودة للعمليات الداخلية
طب ازاى مش لاقى مع ان الحكومة بتكفل حق الشعب بالتعبير وإخراج ما بداخلة من مشاعر فياضة وأراء .
ما علينا دلوقتى علشان ما نسبقش الاحداث

خلينا الاول فى المناديل او كما يدعوها البعض بكلينكس ودوول فى الغالب بيبقوا عيال فافى ..
باكو مناديل يتيم بنصف جنية مصرى فقط لا غير حيريحك ويرحنا معاك .... بلاش يا سيدى .... منديل محلاوى من عمك سمير اللى فى أخر الشارع بجنية ونصف بس ... وحيقوم بنفس الوظيفة
يا اما بقى تجيبلك بكرة مناديل من بتاعت التلاوتات دى واهى طويلة وتعيش معاك بدل ما تظروتلنا الدنيا

نيجى بقى للكلام اللى بجد وهو النوع الثانى من العمليات لان مثل هذا النوع من العمليات يجعل الشخص سعيدا وشاعرا بالراحة طول مدة العملية كما أنه يبذل كل ما بوسعه لأنجاح تلك العملية سواء بالغناء والتمايل او بالتركيز
وغالبا ما تنفذ مثل تلك العمليات فى الجناين او جنب السور او وراء اى اتوبيس نقل عام راكن على جنب

الاسباب والدوافع التى تجعل هؤلاء الاشخاص يستخدمون الجناين بدلا من الحمامات العامة ؟
قد تتوافر عدة اسباب لفعل ذلك ونذكر منها على سبيل المثال

انك علشان تدخل الحمام تدفع ربع جنية بحالة .... بغض النظر هما بيعملوا بيه ايه .... الا ان كدة الحكومة بتقف امام راحة الشعب وترفض التعبير عما بداخله ... فالناس بتسترخص وتصرًف نفسها فى اى حتة على جنب ... واهو ما حدش واخد باله .. مع ان كل الناس بتبقى مركزة معاه

ولذلك انا بوجه صوتى للمسئولين ارجوكم ارحمونا ... وريحوا الناس وبضم صوتى للحملة الشعبية اللى اسمها
يا توفرولى حمامى يا حطرطش على اللى قدامى
وكمان الحملة اللى اسمها
يا توفرولى منديلى يا هورى الناس برا....

انا عارف انه موضوع مقرف بس هو دة حال الدنيا
المهم بقى مش دة الموضوع اللى كنت حتكلم فيه اصلا بس لقيته جاى على الريحة

ومن الألش ما قتل ...!

بداية احب اقول أن انا توبت توبة نصوحة ومعدتش حألش تانى ودة راجع لسبابين :
السبب الاول: ان اللى كنت بعمله فى الناس بط بط بيطلع عليا كتاكيت كتاكيت
السبب التانى: انى اكتشفت ان الالش مضر جدا بالصحة ويسبب الوفاة
ومن ساعة ما سيبت الالش وعاهدت نفسى انى مش حألش تانى وانا حاسس ان ربنا بيعاقبنى بذنب الناس اللى ألشت عليهم زمان يعنى عندك مثلا ..

رايح اشترى اسكتش عادى زى بقيت البنى ادمين بقول للراجل ما عندكش لون تانى غير البينك دة (Pink) يرد يقولى بينك ولا ولد ... ولولا انى كنت محتاج الاسكتش انا كنت قلبت الترابيزة عليه ..

وفى مرة من ذات المرات اللى حبيت اصور فيها ورق علشان ربنا يهدينى واذاكر شوية ... دخلت المكتبة لقيت 3 بيصورو بردة
وبكل برأة ونية حسنة بسأل الست اللى بتصور هى الورقة بكام ؟
- بـ 8 قروش
يرد واحد من اللى واقفين (قروش بحر ولا فلوس)
انا وبدون اى مقدمات سيبت المكتبة ومشيت قائلا فى سرى (ابوك لأبو المصرية للاتصالات فى ساعة واحدة )

دة مش كدة وبس دة انا حاسس ان اللعنة بتطاردنى فى كل حتة .. حتى فى الترام
راكب فى حالى لا بيه ولا عليا والكمسرى بيتكلم مع واحد ومن ضمن الكلام بيقولوه
- اه اه ما الحاجة ام الإختراع
يرد عليه
- لا الحاجة ام احمد .. هع هع ..
وانا اهىء اهىء .. مكنش بأيدى حاجة اعملها غير انى انزل قبل محطتى بـ 3 محطات

دة الناس حتى بتألش على الريق فى المحاضرات ما يعرفوش انه حرام ..
لما الدكتور بيسأل الطلبة لما نضغط على المادة اية اللى حيحصل ؟؟
- يرد واحد.. المادة حتعترف ...
المرة دى بقى كان فى أيدى جومة قومت رزعها فى قفاه ...
وبعد ما خلصت المحاضرة بيسألنى عملت كدة ليه ؟
قولتله علشان انا قطعت وعد على نفسى اضـ....
- استنى .. قطعت وعد على نفسى .. طب "نفسى" ما اتعورش ...هههههه
- لا غور بقى. يلعن .... يحرق ..... يخرب .....

والحمد لله ربنا رازقنى مؤخرا بحبة صحاب قاعدين يألشوا عليا فى الرايحة والجاية لدرجة انى دماغى هنجت و فقدت الخط الفاصل بين الواقع والالش فياريت لو عاوز تألش عليا تقولى قبلها علشان افهم انك بتألش واقولك ربنا يسامحك ..
ومنهم لله بقى مؤسسى علم الالشيولوجى .... الشنتاين والشميدس
وعلى رأى اللى قال اه يانى يانى يانى مش حألش والله تانى
بالمناسبة اية رايك فى البيضة اللى فوق دى؟ .. اصل انا اللى راسمها وحاسس ان ليها علاقة بالموضوع :)

الخيار والبتنجان وعلاقتهم بالكوسة وطالب هندسة !!

قام كل طالب بإستلام خيارة وكتالوج يوضح طريقة الاستخدام فى بداية الدراسة ولكن الطلاب لم يفهموا ما هو المخزى الحقيقى لهذه الظاهرة
وبعد فترة تعايش مع الاوضاع فى كلية الهندسة اكتشف الطلاب بأن شعار هندسة هو الخيار,البتنجان,الكوسة

الخيار:
لان الكلية عمله زى الخيارة يوم فى ايدك ويوم فى السلطة بس الحقيقة انها دائما بتبقى فى السلطة وتختلف خيارة كل واحد حسب القسم اللى هو فى يعنى عندك مثلا خيارة بتوع كهرباء عبارة عن لمبة الاووظ وخيارة بتوع مدنى بتبقى حبة سياخ حديد مسلح وخيارة بتوع ميكانيكا بتبقى خوازيق والخيارة الاشهر على الاطلاق خيارة عملة فيها مسطرة حرف تى ودى بتاعت طلاب إعدادى
المشكلة انه برضاك او غصب عنك لازم تستخدم الخيارة دة مش كدة وبس .. دة كمان كل ما تكبر كل ما الخيارة تكبر معاك لحد ما تبقى اتاية
دة كل دة غير الخيار الإضافى ... خيار من الدكاترة على حبة من المعيدين دة غير الخيار بتاع امتحانات الترم والميد ترم والخيارة الكبيرة يوم النتيجة إن شاء الله

البتنجان:
اما بالنسبة للبتنجان فـ دة متعلق بالمناهج الدراسية وصدق اللى قال " حبيبك اللى تحبه اكله نابت محبة بلا فيزياء لا ودت ولا جابت " وبعد خبرة دامت سنوات وسنوات فى الكلية كان ليه الفخر انى اثبت صحة المعادلة اللى بتقول ان "عدد سنين الكلية = 5 + X " حيث x لا تساوى الصفر
وبعد بحث عميق اكتشفت اننا بندرس الحاجات اللى اجددنا كانوا بيدرسوها... ؟؟! عليهم رحمة الله جميعا
بسلطتها ببابا غنوجها ومن هنا جت العلاقة بين البتنجان والعلم .... و شكرا لكل من ساهم فى صينية المسقعة

الكوسة:
الكوسة بقى لا منها خيار ولا منها بتنجان .... بس دى مش بتبقى لاى حد .... للى بيركبوا الاسانسير بس

-------------------------------------
وياريت محدش يزعل منى لو كان الموضوع جه على الخيارة

طب قولى اعمل اية !!؟

بداية احب اقول مادام الناس كلها بدأت تكتب اللى فى نفسها طب ما اكتب انا كمان


من ساعة ما الإسرائلين احتلوا فلسطين لحد دلوقتى شوف كام شيخ فى جامع دعا على إسرائيل ساعة صلاة الجمعة وكام تريليون "فأكثر" من المسلمين قال امين ...واسأل نفسى وأقول الله !! هو ربنا ما بيستجبش لية ..!!
اكتشفت اننا المفروض ما ندعيش .. المفروض نحمد ربنا ونحمده ونحمده ... على إنه لسه ماولعش فينا بجاز لمؤخذة و.. "مش نظيف"
الناس عوزة ربنا ينصرنا واحنا اصلا ناسين ربنا ... ناسين اقل حقوقه علينا ... المشكلة اننا ما بنفتكرش ربنا الا لما تكون فى مصيبة ... بدون الدخول فى تفسيرات وإختصارا للوقت .... الاية الاشهر على الاطلاق التى يرددها الناس جميعا ليلا ونهارا ولا يعملون بها "ان الله لا يغير ما بقوم حتى يغيروا ما بأنفسهم" صدق الله العظيم
-----------------------------------------
الحكاية ابتدت من باب الكلية لما لقيت الاخوان بيرحبوا بينا على الباب رافعين لافتات "انقذوا فلسطين" و "اين انت يا صلاح" ... الى اخر الشعارات ... دخلت المدرج لقيت اتنين من الاخوان بردة داخلين المدرج .. الاخوان بقى بيعملوا حاجة لطيفة قوى واحد يقف شوية يقرأ قرأن علشان الناس تسكت وبعد ما يسكوتوا يبدا التانى يتكلم مش دى المشكلة احنا متعودين على كدة (بغض النظر عن ان اللى اتعمل دة غلط دينيا وامنيا) المشكلة ان الناس ما سكتتش فيقوم اخ من الاخوة طالع واقف وبكل عصبية ونرفزة يقول "انتوا ما بتسكوتوش لية .. مش عاوزين تسمعوا كلام ربنا .. احنا رجعنا لايام الجاهلية والكفار .. اية الفسق دة..."
طب انت جاى تكفرنا على الريق كدة ما تستنى بعد البريك (الفسحة يعنى) وكفرنا برحتك ..
دخل الدكتور وخلصت المحاضرة وجت المحاضرة اللى بعدها ونفس السيناريو بس المرة دى الناس سكتت وتكلم الاخ التانى يدعونا اللى مظاهرة حاشدة الساعة الواحدة ظهرا ... الساعة واحدة بقى عندنا محاضرة .. ومن المدهش للمرة التانية على التوالى انه بيقولنا سيبوا المحاضرة واحضروا المظاهرة من اجل القدس ومن اجل الله .. والادهش من ذالك انه قالنا ان فى مخطط اسرائيل انها تهدم المسجد الاقصى يوم الثلاثاء الموافق 16/3/2010 اللى عاجبنى فيه بقى انه عارف المخطط الاسرائيلى يبدو انه واد واصل ومظبط الجنينى بتاع الموساد
----------------------------------------
مع كامل احترامى لكل الثورجية
طب ادينى حلول عملية ! طب اروح احارب ؟ طب افجر نفسى ؟ طب اعمل اية ؟ طب المظاهرة عملت اية ؟ طب انت عملت اية ؟ طب ماتش مصر والجزائر خلص كام كام ؟

انا كل اللى قدرت اعمله انى اكتب الموضوع دة و بأدعى ومتأكد انى دعوتى مش حتستجاب تحب اقولك ليه ؟
انا حقولك على حبة حاجات افهمها زى ما تفهمها ...

• ان الله لا يغير ما بقوم حتى يغيروا ما بأنفسهم
• من أعمالكم سُلِّط عليكم
• انما بعثت لأتمم مكارم الأخلاق
• خير ما يصعد من الارض الى السماء الاخلاص وخير ما ينزل من السماء الى الارض التوفيق
• إن تنصروا الله ينصركم
• واعتصموا بحبل الله جميعا ولا تفرقوا
  
• المحاضرة
• 1 نوبل فى مصر = 10 نوبل فى إسرائيل
• للبيت رب يحميه
• رحم الله من قال: رأيت هناك إسلاماً ولم أرى مسلمين، وهنا رأيت مسلمين ولم أرى إسلاماً
• اللهم دبر لنا فإننا لا نحسن التدبير

ولو ما فهمتش روح بقى دور على صلاح خليه ينفعك

الموضوع دة مجرد وجهة نظرى وخواطرى مش اكتر وللاسف مُختصر الى اقصى درجة ممكنة ولو مش عجبك ... حق الشتيمة مكفول للجميع
ملحوظة :
ماتنسوش تبوسوا الواوا

امتى تعرف انك فى مصر . ؟؟!!

لما يبقى ما بين القطار والرصيف عدد 1 متر مُقاس من جميع اﻻتجاهات
وانت راكب تقول للكمسرى هى دى محطة اية يرد يقولك محطة قطر ....
وانت نازل تلاقى واحد بيقولك ممكن تزكرتك يا زميلى .

لما تصحى الصبح بعد شبورة جامدة تلاقى عربيتك مكتوب عليها "حمرا...."
وتصحى اليوم اللى بعدة تلاقى مكتوب "مسحت حمرا ليه يا ابن التيت"
و تلاقى على الشباك من الناحية التانية "مع تحيات سيكو والجعر" ... والعربية اللى قدامك مكتوب عليها "سيكو والجعر توكيد لفظى"

لما يبقى نصف اللى راكبين فى الترام نازلين المحطة الجاية
اما عن النصف التانى فلغالب بيبقى معاهم ابونية او شغال فى المصلحة

لما تبقى تلات تربع البلد مش عارفة هى بتكلم مين ولما تقاوح معاهم يطلع الموبايل قال يعنى حيكلم الباشا الكبير

الاصرار العجيب لممارسة رياضة الباسكت مع صندوق الزبالة

لما تدى ميعاد لواحد الساعة 5 يتصل بيك الساعة 7 يقولك هو انت مش جاى ولا اية !!!

لما توقف مشروع مكتوب علية "ابو قير" تقوله "كابو" يا اسطى بقولك لا والله "المندرة" ..

البلد الوحيدة اللى عندها صيدلية "التعبان" و جزارة "سدق المعفن" و "المشوش" للاقمار الصناعية ..

لما تلاقى واحدة صينية بتخبط عليك تقولك "اندوكوا اروسه" تقولها لا .... تقولك "تب ماما ايزة هاجات" ..

وانت راكب الاتوبيس تلاقى واحد بيسأل الكمسرى هو الاتوبيس دة بيروح فين ؟؟
الكمسرى يرد.. بيروح لأخر الخط ..
مش دى المشكلة .... المشكلة لو رد قالو خط ولا كارت ... انا كان ممكن ساعتها اتشل او انط من الاتوبيس

لما تلاقى واحد بيخبط على الباب تفتح .. يقولك لو سمحت هو وليد موجود ..
- لا والله ما فيش حد فى الدور ده كله اسمة وليد ...
- طب ام وليد او ابو وليد
- يعنى دلوقتى وليد نفسه مش موجود تفتكر امه حتكون موجودة
تلاقية بيخبط بعد ربع ساعة
- طب معلش فى حد هنا اسمه خليفة
- لا والله ما فيش حد اسمه خليفة ... ولا ام خليفة ولا ابو خليفة

وتنفرد مصر انه عندها المدهش "ابوسعيد" و المدهش "ابو احمد" والمدهش "ام اللالى"..
وكمان "ابوربيع" و "ابوربيع الجامعة" و "اولاد ابوربيع" و "ربيع" نفسه ... وسلملى على حقوق الملكية

ولما تبقى كل الحاجات دى بالنسبالك حاجة طبيعية

مشروع طالب مصرى !!

انا الحقيقة مش عارف هو مشروع طالب مصرى .. ولا مشروع المحطة الموقف ..

حسب دراسة قد اجريت على اذكى اطفال العالم كان نصيب الطفل المصرى
الحصول على المركز الاول فى هذه المسابقة
=================================
بعد التخرج من الكلية ان شاء الله ممكن يكون لينا نصيب كبير فى الحصول على المركز الاول بردة
بس فى مسابقة اغبى شباب العالم
=================================
انا مش عارف الصراحة العيب فين ؟؟؟ ولا من مين ؟؟؟ العيب فينا ولا فى الحكومة ولا فى المناهج ولا المدرسين
ولا فى الميزانية ولا فى الطماطم ولا اية ....
تدخل الامتحان تكتب الكلمتين اللى انت قاعد تحفظ فيهم بقالك 4 شهور وتطلع الاول على الجمهورية
اظن بقى ما فيش تعليم اسهل من كدة ....
وبعد الامتحان يا مولاى كما خلقتنى

تعالوا نحسبها ....!
قاعد فى الفصل حوالى 60 او 70 طالب متنيلين فوق بعضينا علشان نسمع الاستاذ اللى هو اساسا جاى مخنوق وقرفان ومش طايق حد يقوله اى كلمة

وعاوز يطلع غيظه على اى حد يقولك اللى مكتبش الدرس 12 مرة يقف علشان ينضرب واللى ناسى الكتاب او الكراسة او الادوات بتاعت الحصة دى او الحصة اللى بعدى يطلع برة ..
الله يحرقكوا ويحرق المدرسة على الناظر على المدير على الحصة على الولية فى ساعة واحدة الواحد قرف من حياته الصبح طابور العيش وبعدين الاتوبيس على طوابير المصالح الحكومية على طابور المرتب على التأمين الصحى ... بقالى 25 سنة شغال فى المدرسة وبأخد 300 جنية الله يخربيت دى عيشة

تضطر تأخد درس لانك اكيد ما فهمتش حاجة من الاستاذ فى الفصل تتراوح الاسعار من 80 الى 200 جنية فى الشهر الواحد ولو دخلت بنفرين تأخد تخفيض 1% ودة طبعا مش لاى حد للناس اللى بحبهم بس

واولياء الامور عوزة تشوف ابنها اللى حلتها مهندس قد الدنيا ولا دكتور.. يطلع عنهم يا عينى الصبح وبالليل واللى بيشتغل 5 شغلانات علشان يأكل ولاده ويدفع ثمن الدروس الخصوصية دة غير الجمعيات والديون واللى بيحرم نفسه من العشاء علشان ولاده يستعشوا والافلام دى كلها ..

اما بقى بالنسبة للطالب مش فاهم اى حاجة نايم طول النهار فى الفصل ولما يتخنق من كتر النوم يزوغ واخر النهار يروح الدرس ويجى فى اخر شهر كدة ولا حاجة يفتح الكتب يحفظلو كلمتين من الكتاب اللى مااتغيرش بقالوا 90 سنة علشان يجيب مجموع


العيب طلع من مين بقى يا معلم ؟؟؟
اكيد من الطماطم

اطرشنى يا نجم !!

• الموضوع طويل وحتكملوا عافية للاخر
  
• يمنع من قرأة الموضوع اصحاب الاحساس المرهف واللى بيسمعوا تمورة
  ولا اقولك اديهم فرصتهم ...
• انا مش حتكلم عن الاصوات لان دى محتاجة جرنال لوحدها
  

واضح من عنوان الموضوع ان انا حتكلم عن الاغانى ولو مكنش باين ادينى قولت
انا قررت انى اكتب الموضوع دة من ساعة ما فتحت التليفزيون ولقيت واحدة بتغنى لبسة حاجة كدة مش عارفها مرسوم عليها شعار "PlayBoy"
(ملحوظة: لو ما تعرفش يعنى اية بلاى بوى ما تعملش فيها واد صايع وبتاع نت وتروح تبحث فى جوجل)
واحد يقولى طب اية بقى الحاجة اللى كانت لبساها دى ؟
اقولك انا مكنتش مركز فى اللى لبساه انا كنت مركز فى اللى مش لبساه ...

قلبت يا عم القناة لقيت واحدة تانية بتضرب واحد من تحت الترابيزة الظاهر والله اعلم ان دة الواد السيس اللى بتحبه بعد ما ضربوا بعض من تحت الترابيزة قامتلوا على الترابيزة وقاعدة تهددوا لانها كانت تعبانة من كتر الضرب اللى كان تحت الترابيزة.

قلبت بردة لانى ما استحملتش الضرب ..
القناة دى بقى كانت مختلفة لان الاتنين كانوا متخصمين وعلشان تصالحو المغنية قلعت الـ ..... وطلعت ترقص على ترابيزة فى كبارية واهى بالمرة تصالح الناس الموجودة معاه ..

انا للاسف مش بتكلم على الاغانى الشعبية لان دة مستواها وهى اصلا مش بتيجى فى التليفزيون وبعدين انا حقول اية اكتر من اللى قالتو اسمها اية: "انا تعبانة" ولا اللى قالو اسمه اية: "السيجارة البنى"
انا بتكلم عن الاغانى المفروض انها راقية واسمها اغانى لان الرقص دة رسالة .. سورى اقصد الغنى لذلك انا بتكلم على الاغانى اللى بيطلعوا فيها على السطوح.

نيجى بقى لنوع تانى من الكليبات ودة متعلق بالاغانى الحزينة ودة عادتة بيتصور يا اما فى حمام والمغنى بيستحمى يا اما فى الشارع والدنيا بتشتى علية حشرحهم نوع نوع بس انت ركز

لو البنت -الموز- ظبطت المغنى بيخنها مع صحبتها -الموز برضه- بتنزل تجرى فى الشارع والمغنى بيجرى وراها وهنا بقى يبدأ مسلسل الرعد والبرق والشتاء ومافيش مانع لو عربية جاية بسرعة وخبطت البنت
(ملحوظة: لازم تبقى صحبتها من 20 سنة)

إنما بقى لو المغنى مخاصم حبيبته من فترة ونفسيته تعبانة ومحتاج يرتاح دة عادتة بيبقى فى الحمام وبيكون بيستحمى لانه بيت الراحة ودة بيساعد المغنى على إخراج مشاعره دة غير ان دخول الحمام مش زى خروجه يمكن لما يخرج حبيبته ترجعله
وانا الحقيقة عندى تعليق صغير هنا ان المخرجين بيتعمدوا الاسلوب دة مع المغنين الجداد علشان لما يشتهر ويتخانق مع المخرج يقولوا انت نسيت نفسك ولا اية دة انا اللى نظفتك يا معفن

فى النهاية احب اقول الغرض من الاغانى (الكليبات) هى الفرجة والهز والوز إنما الاغنية اتنيل واسمعها فى اى حتة اهى مرمية على النت
"دة لو كان فى اغانى تتسمع اصلا "
وانا بوجة ندائى للمسئولين يا ريت يعملوا كليبات صامته علشان الشباب بيحب يركز فى ادق التفاصيل والاغنية بتشغوش على تركيزه

وعلى رأى اللى قال هو الكليب دة ما فيهوش حريم دة يبقى كليب زبالة