وانا قاعد لا بيا ولا عليا كدة الاقى امى داخلة عليا بورق من ايام ثورة 19 للوهلة الاولى انا فكرت امى حتقولى مثلا احنا لقينا ورقة بردى من ايام عصر الملك شحرور كانت مدفونة تحت البلاطة رقم 25 من ناحية المطبخ واكتشفتها بالصدفة وانا بحفر لاى سبب من الاسباب وحنتاجر فى الاثار بقى ونبقى اغنيا،
يا اما على الاقل حنطلع ناس محترمة ونسلمها للهيئة القومية للاثار ويكفئونا على امانتنا والدكتور زاهى حواس يدينى وسام وشهادة تقدير ونأخد بردك فلوس ونبقى اغنيا،
لقيتها بتقولى ان دة ورق المعاش وورق التأمين والمفروض انها تملاه والحروف مش باينة فجيالى اساعدها فى اننا نقرا الورقة اللى حتصرف بيها المعاش !!
احنا فى 2014 دلوقتى تقريبا على ما انا متذكر والورقة مكتوبة بخط الايد ومطبوعة على ورق اصفر والطباعة سايحة والكلام مش باين دة ان لم يكن الورق دة مطبوع بالكربون وواحد يا عينى قاعد بيكتب فيهم من ايام ما كان بيكتب منشورات ايام الانجليز !
امى بقى سابت كل اللى فوق دة وكانت كل مشكلتها ان المكان بتاع رقم البطاقة مش حيكفى الـ 14 رقم !!
مالازم ما يكفيش رقم البطاقة لان الورق دة من ايام ما كانت البطاقة 5 ارقام !
فانا الصراحة استغربت ان كل مشكلة امى مع الورقة ان رقم البطاقة مش حيكفى ! فسألت..
قالتلى ان الورقة دى بالنسبة للورق اللى كان بيجلهم قبل كدة تعتبر من عوامل الرفاهية اللى ممكن اى موظف فى الحكومة يحس بيها لا وكمان دى ورقة نظيفة علشان هما حيطلعوا معاش بقى وكدة فجيبنلهم افخر واحسن انواع الورق الموجود فى السوق.
موقف بسيط زى دة ممكن يعرفك احنا فين على الخريطة ! الحقيقة ان الخريطة نفسها مش عارفة احنا فين !! D:
