الأسم مش جديد .. وبطاقته شكلها كئيب .. وفى صورته .. مطاطى راسه وضحكته طالعه بتنهيد
والجنسية لمؤخذة مصرى .. والوظيفة .. عاطل وشهادة خبرة من قهوة عم كامل
وفى ايده باسبوره
مهاجر .. وسايب اهله وناسه .. خطى خطاه بالليل وسط الغمام والعتمة .. وهو بيحط رجله سمع الف خطوة .. جايه وجايبه شعاع من نور وبيقولوا دى الثورة ..
من فرحته اتكعبل ووقع باسبوره .. وبطاقته كانت فيه محشوره فى سطوره
الاسم اسم مصرى جنسيته بردة مصرى وعشان البطاقة تكمل كتب الديانة مصرى
وحط صورته تلت الوان واكمن البطاقة ابيض واسود ظهر الاحمر بهتان
وقال لنسره قوم .. ده انا اللى نزلت الميدان
ولما دمه نزل .. نزل على بطاقته واتلونت صورته بالتلت الوان .. وراح الاحمر البهتان
وجرى دمه على كفه يرسم طريق قدام
وعشان القصة تكمل .. ويسافر لرب مجيد .. كتب الوظيفة شهيد
