العدل فى وطنى !

بيع العدل بكوز ذرة وبيضتين
وعلى ثمنه كمل واستورده م الصين
بأستك وسلوفانه وفى الشَدّة متين
وان عطل منك افتحه وبخّره وشحمه بفزلين
واديله زقة او خبطة ع الجنبين
وشغله بحجارة او حطله بنزين

اعترافات نص الليل ! - 2

اعترافات نص الليل الجزء الاول !

علّى ان اعترف ان انا بحب العيال الصغيرة اما يكونوا بلابيص بالبامبرز ♥ ! والريحة بتاعتهم كمان.. ولما اخلف ان شاء الله حقعّد عيالى عرايا كدة طول النهار!

انا كنت كاتب فى رغبات الكلية مدنى وجتلى ميكانيكا مع ان مدنى مجموعها اقل من ميكانيكا ثم انا كنت شايل ميكانيكا اساسا !!
ومافكرتش اروح احول قولت اكيد ما دام ربنا جبهالى يبقى فيها خير ان شاء الله

كنت بتضايق وانا صغير اما كنا نركب مواصلة ويدفعوا لكل الناس وما يدفعوليش احساس وحش قوى ! انا اصلا كنت مفكر الراجل السواق بيحوشهملنا !

وانا صغير كان فى ناس بقولها يا عمو مش عارف ليه وناس تانية بقولها يا خالو مش عارف ليه بردة! المهم ان اى حد منهم كنت بقوله عموخالو كانوا مفكرنى بهزر معاهم ويضحكوا بس الحقيقة ان انا مكنتش اعرف اصلا هو انا المفروض اقوله ياعمو ولا يا خالو وبعدين انا اصلا كنت مفكر ان دة اسمهم.

انا ماليش فى الكورة ولا بشجع فريق وماليش فى اى نوع من انواع الـ Games ومش بلعب بلايستيشن واجمد لعبه لعبتها فى حياتى كانت ماريو فى الشريط بتاع الاتارى ابو 100000 لعبة فى شريط واحد !

بحب أكل القطايف نية من غير ما تتحمر 

اسرّح شعرى او ما اسرّحوش بيطلع نفس الشكل D:

مش حافظ ترتيت الشهور وبتلخبط ما بين مايو يونيو يوليو يونيه !! اية الاسامى بنت المهروشة دى اصلا !! ومؤخرا عرفت ان يونيه ويونيو نفس الشهر

كنت بغيب فى اعدادى من المدرسة طول الاسبوع واروح يوم الاتنين بس لدرجة ان العيال اصحابى كانوا مفكرنى شغال حلاق!
 
كنت بحب مسلسل الفرسان جدا ومتابعه وساعة اما قطز اتقتل فضلت اعيط لدرجة ان ابويا صحى من النوم والجيران خبطوا علينا يشوفوا انا بعيط ليه !
والناس كلها كانت قاعدة تقنعنى ان اللى حصل دة مش حقيقى وتمثيل وانا اقولهم ازاااى دى جت فى التليفزيون يا جدعان !

 مكنتش بخاف من الحقن وانا صغير وكنت ساعة التطعيم فى المدرسة بطلع اول واحد اتطعم علشان اشجع بقيت العيال ! ولما كان حد يقولى اعمل كذا بدل ما اجبلك الحقنة اقوله قشطة ماشى هاتها !

كنت بعزف اورج وانا صغير فى ابتدائى واول مرة ليا اقف قدام المدرسة كلها فى الطابور واعزف النشيد الوطنى نسيت افتح زرار الاورج ! D:
مع ان النشيد الوطنى دة كان الحاجة الوحيدة اللى كنت بعرف اعزفها اساسا ! D:

رباعيات الميد ترم اللى فات

لا تشغل بالك فلم اعد اهتم
لن يضر الاجتناب شيئا ولن يفيد الغم
وارسم بوجهك بسمة تشرق لها الدنيا
ودع همى لليل يشكو حبيبا بالفراق هم
 

---------------------------------------

مسلمين الاسم والاخلاق يهود
فى البطاقة محمد والحقيقة لُحود
فى العشا واقفين وسب دين موجود
يااخى ملعون ابو النفاق على ابوالبرود

---------------------------------------

قالوا البيوت اسرار فيها مكفيها
ورا كل حيطة ودار حواديت بتحكيها
ونظرة صبيه لفارس من خلف حواطيها
بالرمش قلبه تصيب والرب حاميها

---------------------------------------

يا ام الضفاير دهب متزينة فضة
وشال خيوطه حرير على كتفك اتغطى
ورمش فوق العين من كُحلك اتوضى
انا قلبى فى عشق حُسنك لسه بيتخطّى

---------------------------------------

ست الحُسن كبرت وعدت الستين
ولسه جميلة بردة وجملها يخزى العين
وفى البلكونة قاعد وبتسأل القاعدين
امتى حيجى اجلها وتروح لنور العين

عن الفلاحين ولاد الـ**** اتحدث !!

 
وكعادة كل سنة يتوافد الفلاحين من كل حدب وصوب الى مدينتنا الغالية اسكندرية بتصرفاتهم وسلوكياتهم وجلاليبهم يفترشون الملايات على رمل البحر ويشربون من القله ويأكلون ويرمون الباقى حولهم !! فكل عام نفس الشئ ايها الفلاحين من فضلكم دعونا نعيش فى مدينتنا بسلام لكم ترعتكم ولنا بحرنا... فانتم تخرّبون مدينتنا العزيزة.. 

هل فكرت يوما ايها الأسكندرانى ان تذهب الى بلاد الفلاحين لتخرّب فيها كما يفعلون فى مدينتنا الغالية الأسكندرية !؟ اذا كانت الاجابة بـ لا فعليك ان تفعل عليك انت تذهب ايها الاسكندرانى الى بلاد الفلاحين يوما ما لتعرف وتجرب حجم الترحيب وكرم الضيافة والصدق والابتسامة والبشاشة الذي ستجده هناك ستجد من الخير ما يقدم لك دون مقابل وهم حتى لا يعرفونك لمجرد انك ضيف غريب لست من بلدهم..

حاجات تفرح :)

• اشترى بونبونى ووزعه على الأطفال اللى بتقابلها فى الشارع واتفرج على ضحكتهم
• اشترى أكله انت بتحبها قوى واديها لأى حد غلبان تقابله
• هات شوكولاتة لحد عزيز عليك واديهاله بمناسبة اى حاجة حتى لو سبب ملوش لازمة
• اصحى صلى الفجر وأدعى لأصحابك والناس اللى بتحبها بظهر الغيب
• قول لأختك قد اية هى جميلة او ان الطقم اللى هى لبساه شيك وحلو عليها
• اصحى الصبح بدرى واعملهم الفطار فى البيت
• كل اكله انت كنت بتحبها وانت صغير ومكلتهاش من زمان
• غير حاجة سلبية فى حد انت بتحبه وراقب التغير اللى حصله
• لما الدنيا تشتى انزل أشترى ايس كريم حجم كبير وامشى كُله فى الشارع
• روح للراجل اللى بيشيل الزبالة فى منطقتك وقوله شكرا ربنا يجازيك عنا خير
• روح نام على الصخور بالليل على البحر وبص للنجوم
• اتفرج على صورك وانت صغير 
• اشترى بلالين وزمامير واطلع انت واصحابك على دار ايتام والعبوا مع الاطفال طول النهار
• اشتغل فى اى عمل خير تطوعى وروح نام بعد يوم مُرهق حتلاقى نفسك تعبان وبتضحك
• روح زور المدرسة اللى انت كنت فيها وسلم على المدرسين اللى كانوا بيدرسولك والعمال والدادات
• ارسم حد غالى عليك حتى لو بترسم وحش او ما بتعرفش ترسم واديهاله
• اطلع فوق سطوح بيتكوا واقعد اتفرح على الناس وبص للسما
• صور حد من اصحابك صورة حلوة قوى وفرجهاله ومتدهالوش
  وصوره صورة وحشة جدا وفرجهاله وماتدهالهوش بردة D:
• لما تخرج انت واصحابك اى خروجة ما تنسوش تأخدوا صورة كلكوا فى أخر اليوم
• لو خاطب هات لخطيبتك بالونة وانفخهلها وهى بتلعب بيها فرقعها
• روح بص فى المراية دلوقتى حتلاقيك فرحان وانت لسه ما عملتش حاجة شوف بقى اما تعملها :) 

لما تكبر حتعرف !!

ادينى اتنيلت على عينى كبرت ومعرفتش بردة !!
بعض الاسئلة فى الصغر لن تسمع لها اجابة غير لما تكبر حتعرف كان اشهر هذا الاسئلة هو انا جيت ازاى !!؟
اما تكبر حتعرف !!
كنت اود ان اخبرهم "انا عارف كل حاجة على فكرة بس قولت أتأكد بردة!!" D:

كنت اتمنى حقا عندما اكبر ان اعرف انا جيب ازاى! ولكن الامر مازال محيرا بالنسبة لى بل ويزداد صعوبة وتعقيدا عندما افكر فى الامر.. اعتقد ان الله وضع هذا التساؤل فى فطرة كل انسان كى يبدأ فى البحث عن حقيقة وجوده فى هذه الحياة... الامر ليس بهذه السهولة كما تعتقد يبدأ السؤال فى لحظة ادراكك انك فى الحياة تسمع وترى وتتحرك وتشعر فأنت قبل تلك اللحظة لم تدرك شئ وفجأة تجد نفسك موجودا فى الحياة فتسأل نفسك هو انا جيت ازاى !! فلا تجد اجابة !
فتبدأ تسأل من هم اكبر منك لعلك تجد اجابة لسؤالك فتزداد حيرة
مجرد سؤال برئ فى الطفولة اثار حيرتى والاجابة اثارت حيرتى اكتر واصبح هناك سؤالين هو انا جيت ازاى ؟ وليه لما اكبر حعرف ماعرف دلوقتى وخلاص !!
اعتقد اننى كنت اسأل عن لحظة ادراكى للحياة او كيف اصبحت فجأة موجودا هنا وليس العملية الفسيولوجية التى اتيت بها ولكنى لم استطيع التعبير وقتها عما هو فى نفسى ....
ببساطة إدراكك ذاتك ونفسك يحتاج ان تسأل الوحيد الذى يمتلك الأجابة على سؤالك !! خالقك ♥ :)

وشه التانى !!

تيجى اوصفلك وشه التانى...
دمه بيغلى جوه عروقه وش بلاستك وش حزين
وش من التجاعيد اتشقق رسمت رحلة عمر قديم
وحنة راسه فى شعره الابيض وعفره فى ذقنه من التدخين
وشه التانى اتغير شكله وعجّز بدرى من التفكير
اهو دة بقى مش وشه التانى...
وشه التانى زى الاول نفس ملامح طفل عنيد
وشه التانى بيضحك برضه وش بيفرح وش سعيد
وعنيه بتغمض من البسمة وتدمع فى صلاة العيد
ويظقطط من الصحبه الحلوة وشاى خمسينة ولبس جديد

وشه التانى لسه بيحبى لسه بيسند لسه بيلمس طرف الباب
لسه براءته جوه شفايفه وضى عيونه مازال كداب
وشه بيحكى الف حكاية والف رواية والف كتاب
لسه بينطق اسم حبيبته وشايل جوة جفونه سراب
لسه ملامح وشه فى قلبه ويجرى العمر ولسه شباب 

اعترافات نص الليل !

انا شخصية معقدة الى حد كبير من البط والوز علشان وانا صغير كانوا بيجروا ورايا عاوزين يعضونى علشان كدة انا مبحبش اكل البط والوز عقابا ليهم على اللى كانوا بيعملوه فيا وانا صغير

بحب أكل البطاطا نية عادى يعنى اية المشكلة! اصلا طعمها جامد جدا وهى نية والبسلة كمان

ماعرفش الفرق ما بين الجاموسة والبقرة ولو حد يعرف اية الاختلافات التقنية ما بينهم ياريت يقولى

لما كنت بشوف جاموسة او بقرة يعنى "ايا كان الحيوان اللى بيجبلنا اللبن وخلاص" وهى بتتحلب كان بيبقى نفسى اجرب احلبها انا كمان ولما حاولت ما اشتغلتش معايا !! هى لية ما اشتغلتش معايا مش فاهم انا عملت زى ما هما بيعملوا بالظبط !! متضايق قوى انا

لحد وقت قريب كنت عايز اعرف مين "سعد نبيها" اللى صفاء ابو السعود بتغنيله فى العيد فرحة واعتقد ان فى جيل بحاله بيدور عليه بردة

هو لية الستات بيتخانقوا مع المستيكة وهما بيمضغوها!! بس الشهادة لله ميكانزم مالوش حل فى الطرقعة طول عمرى نفسى اعمله وفى كل مرة افشل

مش حافظ جدول الضرب بتاع الـ 7 و الـ 8 والـ 9 ومش عايز احفظهم دى ارقام غبية اساسا والحاجات دى بتجيب تخلف عقلى !!

يوم وقفة العيد دة فى المنطقة حاجة مقدسة  فى الوقت اللى كل الشارع بيشرب فيه حشيش انا كنت بأكل حواوشى من عند السيد ميمى .. ميمى نفسه اساسا كان بيشرب حشيش بردة
 

سحر الطريق !

حاولت مرارا وتكرارا ان ابتعد عن هذا الطريق ولكن قلبى قد استهوى السير فيه.. لا اعلم ان كان هذا قدره ام لذنب قد اقترفه لا دخل لى فيه..
تاه قلبى بين سحرها تارة وفى سجنها تارة أخرى ذلك السجن الذى حبست فيه أخرون كما حبستنى.. اسمع انينهم وصراخهم ولكنى اريد الفوز بهذا السجن وحدى..
فلا تلومنى لا حكم لى على قلبى ولاقرار لى فى قدرى..
يريد قلبى ان يبقى تائها فى هذا الطريق وكيف لا!! وقد تاه غيرى
يريد ان يصل الى نهايته ولما لا!!  فلن يصل غيرى

منديل حياتى ياعين !!

احساس مؤلم جدا انك تكتشف انك كنت منديل طول الفترة دى وانت مش واخد بالك بس الحمد لله كدة الواحد اتطمن على مستقبله يتخرج يشتغل منديل مبيعات ويقعدوا يتفشخروا بيه فى البيت المنديل راح المنديل جه..
والجيران بقى يستلموا امى فى الطالعة والنازلة والله عشتى وشوفتى يا سنيه ابنك بقى منديل قد الدنيا..
امى طبعا مش حتسكتلهم لا يا اختشى انتى وهى كل واحده تخليها فى مناخيرها وتقعد ساكته ابنى طول عمره منديل كبير فى الكلية..

ذكريات ايام الحضانة 2

ستظل ذكرى ابله فهيمة هى الاسواء على الاطلاق فى ذكريات الحضانة بل فى ذكريات الطفولة كلها فقد اطلقت عليها ابلة فهيمة اللى ما بتفهمش حاجة .. مُدرسة التربية الدينية فى الحضانة فقد كنت اخاف منها دون اى سبب فقط لانها ترتدى ذلك الرداء الاسود وتخفى به وجهها -النقاب- على الرغم ان كل من يعمل بالحضانة سيدات والاطفال لا تتجاوز اعمارهم الخمس سنين.!! حين قررت ان تحدثنا عن الصلاة التى طالما احببت ان اقلد ابى فيها وهو يصلى وليتها ما فعلت !! فقد اخبرتنا ان من لايصلى سوف يصليه الله من عذابه وسيحرقه فى جهنم وهيهات من عذاب القبر وظلمته فسيخرج له ثعبان اقرع فى القبر ليعذبه ... لك ان تتخيل اننى قد ذهب الى البيت ذلك اليوم فاتحا فمى من الخضه لا استوعب ما حدث وفجأة قد انفرجت فى البكاء ... دخلت أجرى لأرتمى فى حضن أمى ...

ذكريات ايام الحضانة 1

اعتقد ان طفولتى كانت مختلفة نوعا ما عن باقى الاطفال فى سنى وقتها فانا لم اكن فى حاجة ان ادّعى اننى تعبان اليوم او بطنى وجعانى او اخبر امى كم هى برودة الجو فى الخارج كى اكسب تعاطفها معى وتخبرنى "اقعد النهاردة من الحضانة يا حبيبى"
فقد كانت توقظنى للذهاب للحضانة وتخبرنى -من تلقاء نفسها- ان اغيب اليوم لان الجو شتا برة او الدنيا ساقعة او تستشعر اننى اريد بعض النوم الاضافى فتقولى نام يا حبيبى بلاش تروح النهاردة ..
 طب ما انا كنت نايم لازم تصحينى يعنى !! D:
على الرغم ان الحضانة كانت تبعد مسافة 30 او 40 متر عن بيتى وكانت الدادة بتيجى تأخدنى من بيتى!