متحاولش تبقى مصرى !!

ممكن تكون اتكعبلت مرة فى اعلانات هيونداى بتاعت "متحاولش تبقى مصرى ... العرض دة للمصريين وبس"
بس اكيد كل يوم بتتكعبل فى عروض المصريين ... لذلك لو انت مش مصرى "متحاولش تبقى مصرى ... لان الرفع دة للمصريين وبس"

انتشرت فى الاونة الاخيرة اشاعة احتواء اللحوم على دودة السركوسيست .... طب دى حاجة قشطة قوى
العرض دة للمصريين وبس .. اشترى كيلو لحمة بالدود بتاعه وحنديك صنارة هدية واهى منها لحمة ومنها صيد سمك
ملحوظة :

• متقولش للجزار على حكاية السمك دى لحسن يدفعك ثمن الدود
• يمكن استخدام الصنارة استخدامات أخرى

اما بالنسبة لموضوع الزبالة فقد تطور الشعب المصرى تطور ملحوظ فى الفترة الاخيرة بعدما كان يلقى بها من البلكونة ويستخبى وزى ما تيجى تيجى ... لكن دلوقتى بيتعب وينزل بنفسه يرميها جنب الصندوق من مسافة تبعد حوالى 10 متر عن الصندوق
العرض دة للمصريين وبس .. حاول رمى 5 كياس من مسافات مختلفة وحنلبسك السادس مجانا ...

مش عارف اخدتوا بالكوا ولا لا .. ان المية مرة يبقى طعمها سمك ومرة خيار ومرة ... ولا بلاش
دة غير لونها مرة يبقى اصفر .. ومرة يبقى ابيض .. ومرة شفافة ويسبح بها بعض الكائنات الحية
العرض دة للمصريين وبس .. مصر حتختار طعمها الحق ابعت لشركة مياة الشرب "التشطيف سابقا"
ملحوظة :

• انا شاكك ان فى واحد واقف وراء الحنفية

مشكلة العيال الفافى اللى زيى مع رغيف العيش .. مش ان قطره 10 سم ولا انه فيه رمله و ظلط .. ولا انى مرة بفتح رغيف لقيت رجل صرصار .. ولا انى بقف ساعة الا ربع علشان 5 ارغفة ولا ان عم اسماعيل بيمشى الناس حبايبه الاول ..
المشكلة يا عينى انه بيبقى سخن ومش بقدر امسكه
العرض دة للمصريين وبس .. حاول تستحمل رغيف لمدة ربع ساعة .. وحنوصى عليك عم اسماعيل
ملحوظة :

• على فكرة .. تستحمله اه .. بس مش على ايدك D:
  
• لو حد لقى بقيت الصرصار يا ريت يبعتهولى
• وبالمناسبة دى بوجه ندائى لاخويا التايه فى طابور العيش بقالة 4 ايام وبقله ارجع يا ابنى احنا جبنا عيش فينو ...

وللحديث بقية بعد ما ارجع من باجوش ان شاء الله