تخيل انه بجنية واحد بس ممكن تعرف سعاد عاملة اية النهاردة على العشا
وان رامى فركش مع عبير علشان اختلفوا على فستان الخطوبة هو شايف الفستان عريان وهى راسها والف سيف انها تجيب الفستان دة
وفيفى اتخانقت مع البت مى علشان لون البلوزة بتاعتها كان شبه لون البلوزة اللى هى جابتها من اسبوع بس اكيد مش دة السبب يعنى انت اكيد عارفه اللى حصل قبل كدة
وان المقدسة تريزة بتدور على شغل للواد احمد ابن جارتها علشان ابن حلال ويستاهل كل خير
ومدرس العربى اللى كان بيدى ابن مدام سهير درس خصوصى عاوز 160 بدل 140 علشان ثانوية عامة بقى
والبتاعة اللى بتركب فى السيفون من جوة علشان تقول للماية خلاص تقف شكلها باظت وعوزين يجيبوا واحدة جديدة اسمها عوامة اختى
وطقم المزز اللى راكبين وراك حيتقابلوا فى سان ستيفانوا الساعة 6 وحيدخلوا السينما.. انتوا راكبين المشروع دة غلط اساسا !! D:
وفى مرة مش قادر امسحها من الذاكرة لما حظى السئ قدرلى ان اقعد جنب السواق كان قاعد يبرطم فى كلام مش مفهوم وانا قاعد اكتب هو بيقول اية يمكن حد يقدر يفهمنى !!
- الفشك فى الحمبولى
- دة لا معجون ولا مدهون
- يا ولاد الـ Well Done
- عل ابو فيس بوك امك
- يا ولاد الشيز دانس
- باى كمبورة
- يا كلوزاتك يا ايطاليا
- يا كلوزاتك يا بريطانيا
- نسواس
وادهم لو جعان ممكن يطلع الفراخ من الثلاجة امه عملاها ومجهزها علشان كانت عارفة انها حتتأخر النهاردة ولو مش عاوز فراخ حيلاقى رنجة يطلعها يعملها ومش حيلاقى ليمون ممكن يحط خل او يروح يشترى ربع ليمون من فتحى اللى فى السوق بس ينقيه طرى واصفر مش ناشف واخضر بس مش طرى قوى لحسن يكون بايظ
عنك ما اكلت انت ولا امك يا ادهم !! D:
وياحبيبى ما تنساش تبعت الـ CV بتاعك لعمك اشرف علشان جايبلك واسطة فى شركة البترول والراجل صاحبه قاله ما تقلقش اعتبره اشتغل وبيقبض
ذنب واحد زيى اية يعرف ان هدوم السواق الداخلية بتقع فى الشارع علشان الست هانم مراته بتنشر الغسيل بمشبك واحد مش اتنين !!وان الراجل مشكورا قالها ونبه عليها كذا مرة تنشر بمشبكين وكمان اقترح عليها يعملها منشر داخلى بس هى اللى رفضت
ياريت تخلى قصتك المأساوية مع هدومك الداخلية لنفسك احنا مالناش دعوة اذا كنت بتلبس بوكسرات قطونيل ولا بتلبس جل كابو !! D:
